Tifozët e futbollit që planifikojnë të ndjekin ndeshjet e Kupës së Botës 2026 nuk do të lejohen të sjellin vuvuzela, bilbila, bori ajrore dhe pajisje të tjera që prodhojnë zhurmë të lartë në stadium, transmeton reuters.
Vendimi është përfshirë në kodin e sjelljes së stadiumeve të FIFA-s për turneun që do të zhvillohet në SHBA, Kanada dhe Meksikë.
Vuvuzelat, të njohura gjerësisht gjatë Kupës së Botës 2010 në Afrikën e Jugut, u bënë simbol i atmosferës festive në stadiume, por njëkohësisht u kritikuan për zhurmën e tyre monotone dhe të vazhdueshme, e krahasuar shpesh me tingullin e një tufe bletësh.
Sipas rregullave të FIFA-s, në të 16 stadiumet pritëse do të ndalohen gjithashtu instrumentet që lëshojnë rreze lazeri, treguesit lazer dhe pajisje të ngjashme që mund të cenojnë sigurinë ose zhvillimin normal të ndeshjeve.
Kodi i sjelljes përcakton edhe kufizime të tjera për spektatorët. FIFA thekson se boja e trupit dhe tatuazhet nuk konsiderohen veshje, ndërsa ekspozimi i pjesëve intime të trupit apo sjellje të tjera të papërshtatshme nuk do të lejohen.
Po ashtu, tifozët nuk do të mund të fusin në stadium shishe uji të ripërdorshme, një masë e justifikuar nga organizatorët me arsye sigurie.
FIFA paralajmëron se personat që shkelin rregullat mund të mos lejohen të hyjnë në stadium ose mund të largohen nga ambientet sportive.
Kupa e Botës 2026 do të jetë edicioni i parë me 48 skuadra pjesëmarrëse dhe do të zhvillohet nga 11 qershori deri më 19 korrik në SHBA, Kanada dhe Meksikë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
