28 prilli njihet si Dita Botërore e Sigurisë dhe Shëndetit në Punë e shërben si një fushatë ndërgjegjësimi me qëllim përqendrimin e vëmendjes ndërkombëtare mbi tendencat e reja në fushën e sigurisë dhe shëndetit në punë si dhe rëndësinë e problemeve të lidhura me lëndimet, sëmundjet dhe vdekjet në mbarë botën.
Në vitin 2003, Organizata Ndërkombëtare e Punës (ILO), filloi të shënojë Ditën Botërore me qëllim që të theksojë parandalimin e aksidenteve dhe sëmundjeve në punë, duke përfituar nga pikat e forta tradicionale të ILO-s të trepartizmit dhe dialogut social.
Kjo festë është një pjesë integrale e Strategjisë Globale për Sigurinë dhe Shëndetin në Punë të ILO-s, siç është dokumentuar në Konkluzionet e Konferencës Ndërkombëtare të Punës në qershor 2003.
28 prilli është gjithashtu një ditë, në të cilën sindikatat në botë përkujtojnë dhe nderojnë kujtimin e viktimave të aksidenteve dhe sëmundjeve në punë.
Dita Botërore për Sigurinë dhe Shëndetin në Punë është një pjesë integrale e Strategjisë Globale mbi Sigurinë dhe Shëndetin në Punë e drejtuar nga ILO, e cila promovon krijimin e një sigurie globale parandaluese dhe të një kulture shëndetësore me përfshirjen e të gjithë aktorëve. Në këtë datë, në shumë vende të botës, autoritetet kombëtare, sindikatat, organizatat e sigurisë dhe të shëndetit në punë dhe punëdhënësit, organizojnë aktivitete të shumta.
Sipas statistikave çdo vit në Bashkimin Evropian, më shumë se 5500 njerëz humbin jetën e tyre si pasojë e aksidenteve në vendin e punës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
