Një në tre persona në botë vuan nga mungesa e hekurit

Sot është ”Dita e Mungesës së Hekurit”, e krijuar në vitin 2015 për të rritur ndërgjegjësimin mbi rolin jetësor të hekurit për trup.

Një në tre persona në botë vuan nga mungesa e hekurit dhe ky është një nga problemet më të neglizhuara, megjithëse identifikohet lehtësisht me një test gjaku.

Është, në fakt, një element thelbësor për ruajtjen e funksioneve vitale: ndërhyn në prodhimin e qelizave të kuqe të gjakut, siguron funksionimin efektiv të zemrës dhe trurit dhe forcon sistemin imunitar duke mbrojtur nga infeksionet dhe sëmundjet.

Pa hekur të mjaftueshëm të disponueshëm, trupi i njeriut nuk mund të funksionojë si duhet dhe ndikimi në shëndetin dhe cilësinë e jetës është i konsiderueshëm: lodhje, dhimbje koke, zbehje, thonj dhe flokë të brishtë, ndjeshmëri ndaj infeksioneve, nervozizëm, përqendrimi i dobët janë simptomat më të zakonshme, të cilat mund të ndodhin në çdo moshë.

Sipas vlerësimeve, 90% e nënave të ardhshme nuk marrin hekur të mjaftueshëm gjatë shtatzënisë, duke lënë pas dore se gjatë tremujorit të fundit fetusi ruan 80% të hekurit që do t’i duhet për rritje në gjashtë muajt e parë të jetës.

Për më tepër, mungesa e hekurit prek deri në 50% të pacientëve me sëmundje kronike të veshkave (faza 2-5) dhe afërsisht 70% e atyre që fillojnë trajtimin e dializës.

“Meqenëse anemia dhe mungesa e hekurit kanë një ndikim të rëndësishëm në cilësinë e jetës dhe mbijetesën e njerëzve me sëmundje të veshkave, është e rëndësishme që këto kushte të njihen dhe trajtohen siç duhet,” shpjegon Pietro Manuel Ferraro, profesor i Universitetin Katolik i Zemrës në Romë.