Me rastin e 1 Qershorit, Avokati i Popullit hapi dyert për iniciativën qytetare “Nisma për Fëmijët”, ku një grup prindërish, me autorizim nga Komisioni Qendror i Zgjedhjeve (KQZ), po mbledhin firma për të propozuar një ligj që garanton financimin e plotë nga shteti të kurimit të fëmijëve, brenda ose jashtë vendit.
Komiteti Nismëtar mblodhi firmat e stafit të institucionit dhe mori mbështetjen e Avokatit të Popullit, Endrit Shabani, për ta çuar më tej këtë nismë drejt Kuvendit.
“Nuk ka asnjë shtet aq të varfër sa të mos garantojë shëndetin e fëmijëve. Është e pajustifikueshme që ende në Shqipëri na duhet të ngremë ‘GoFundMe’ për të financuar trajtimin shëndetësor të fëmijëve shqiptarë, në një vend ku shëndetësia është e drejtë kushtetuese dhe ku shteti ka detyrimin ta garantojë atë. Unë refuzoj të pranoj që Shqipëria është aq e varfër sa të na duhet të mbledhim fonde në këtë mënyrë për të shpëtuar jetën e fëmijëve”, deklaroi ai.
Shabani bëri të ditur se institucioni i Avokatit të Popullit do t’i drejtohet Kuvendit me kërkesën për zhvillimin e një seance dëgjimore të posaçme mbi këtë çështje.
“Ne e mbështesim institucionalisht këtë nismë. Do të ushtrojmë kompetencat tona kushtetuese për të kërkuar që Kuvendi të zhvillojë një dëgjesë të dedikuar për këtë çështje dhe më pas të monitorojmë zbatimin e ligjit. E kam të vështirë të imagjinoj një deputet që do të votonte kundër një nisme që synon garantimin e shëndetit të fëmijëve shqiptarë”, u shpreh ai.
Nga ana e tyre, aktivistët Suela Koçibellinj dhe Ardit Konomi informuan se deri tani janë mbledhur rreth 17 mijë firma, ndërsa u bënë thirrje qytetarëve që të mbështesin nismën për të arritur pragun e nevojshëm prej 20 mijë nënshkrimesh.
Ata falënderuan Avokatin e Popullit dhe stafin e institucionit për mbështetjen dhe theksuan se qëllimi i nismës është që asnjë fëmijë të mos mbetet pa trajtimin e nevojshëm shëndetësor për shkak të pamundësive ekonomike apo mangësive të sistemit publik.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
