Përdhunimi i 15 vjeçares/ Meta: Inkurajoj të gjitha nismat kundër çdo forme dhune dhe abuzimi

Presidenti Ilir Meta, ka mbështetur protestën që u zhvillua dje “Kundër fëmijërisë së vjedhur”, pas përdhunimit të 15 vjeçares në Kamëz.

Presidenti Ilir Meta deklaroi sot se “kur çdo formë dhune tolerohet, justifikohet dhe nuk ndëshkohet nga shteti, atëherë dhuna kthehet në sistem”.

 “Do t’i mbështes e inkurajoj gjithmonë të gjitha nismat kundër çdo forme dhune dhe abuzivizmi”, tha Presidenti.

Sipas tij, “një shoqëri demokratike dhe sociale, nuk mund të ketë evolucion pa inkurajuar përpjekjet për fuqizimin e rolit të grave dhe vajzave, veçanërisht pa përmbushur detyrimet për mbrojtjen e të drejtave të tyre”.

Meta i bëri thirrje drejtësisë të mos vonojë në nxjerrjen e përgjegjësive për rastin e abuzimit të 15-vjeçares në Babrru, dhe nxiti institucionet arsimore të jenë më të vëmendshme në parandalimin dhe denoncimin e këtyre rasteve tronditëse”.

“Një shoqëri si e jona, që familjen dhe vlerat e saj i vlerëson të shenjta, duhet të ngrihet e gjitha në këmbë për mbrojtjen e tyre”, tha ai.