Komisioneri Publik kërkon shkarkimin nga detyra të Anton Martinit

Komisioneri Publik ka ankimuar vendimin e Komisionit të Pavarur të Kualifikimit për prokurorin Anton Martini, i cili është kandidat për në Prokurorinë e Posaçme kundër Korrupsionit dhe Krimit të Organizuar (SPAK).

Komisioneri Publik vlerëson se Martini nuk është i besueshëm në detyrë për rikonfirmim dhe duhet të shkarkohet nga shkalla e dytë e Vettingut.

“33. Konsiderojmë se, ndryshe nga sa disponon Komisioni i Pavarur i Kualifikimit për kriteret e rivlerësimit, duke marrë për bazë gjendjen e fakteve dhe provave në rastin konkret dhe të ligjit të zbatueshëm, Komisioneri Publik ndan gjykim të kundërt, pasi vlerëson se subjekti i rivlerësimit nuk arrin nivel të besueshëm për konfirmimin në detyrë;

34. Duke ritheksuar se Komisioneri Publik ka detyrimin që të ushtrojë kontroll mbi vendimet e dhëna nga Komisioni, me qëllim që të garantojë mbrojtjen e interesit publik në procesin e rivlerësimit, duke vlerësuar në qoftë se vendimmarrja e Komisionit për konfirmimin ose shkarkimin e subjektit, ose ndërprerjen e procesit të rivlerësimit është marrë në përputhje me ligjin, në përfundim të një hetimi të plotë, mbështetur në faktet dhe provat e administruara për këtë qëllim;

36. Komisioneri Publik kërkon, në përfundim të shqyrtimit të çështjes në seancë publike, të vendosë:

– Ndryshimin e vendimit nr. 231, datë 29.1.2020, të Komisionit të Pavarur të Kualifikimit, dhe shkarkimin nga detyra të subjektit të rivlerësimit, z. Anton Martini”, thuhet ne ankimin e Komisionerit Publik.

Prokurori Anton Martini u konfirmua në detyrë më 29 janar të këtij viti nga KPK pas dy seancave dëgjimore të mbajtura me 10 dhjetor 2019 dhe 27 janar 2020.

Seanca e dytë dëgjimore ndaj prokurorit Anton Martini u zhvillua pas riçeljes së hetimeve prej një denoncimi mbi shortimin e çështjeve në Prokurorinë e Shkodrës, gjatë kohës që ai ishte drejtues.