Agjencia e Mjedisit: Sot shënohet Dita e Liqenit të Ohrit dhe Shkodrës, dy mrekullitë që prekin skajet e Shqipërisë

Agjencia Kombëtare e Mjedisit kujton sot Ditën e Liqenit të Ohrit dhe Shkodrës, dy nga mrekullitë e natyrës që prekin skajet e Shqipërisë.

21 qershori shënon fillimin e sezonit turistik në tre bashkitë që lagen nga Liqeni i Ohrit, Struga, Ohri dhe Pogradeci.

Mesazhi është rritja e ndërgjegjësimit të publikut për një bashkëpunim sa më të madh midis qytetarëve dhe autoriteteve për mbrojtjen e Liqenit të Ohrit si një pasuri natyrore e pazëvendësueshme. Liqeni i Ohrit është një nga liqenet më të mëdha në Gadishullin Ballkanik dhe llogaritet si një nga liqenet më të vjetër në botë.

21 qershori 2006, shënon nënshkrimin e marrëveshjes dypalëshe Shqipëri-Mali i Zi, për mbrojtjen e Liqenit të Shkodrës. Që nga ai vit, kjo ditë përkujtohet si Dita e Liqenit të Shkodrës, përmes një sërë aktivitetesh të përbashkëta, me qëllim nxitjen e menaxhimit të qëndrueshëm të ekosistemit të Liqenit, që vlerësohet si më i madhi në Ballkan. Fauna e liqenit është e shumëllojshme dhe e pasur me 45 lloje peshqish e 270 lloje shpendësh. Një perlë e kësaj pasurie është padyshim pelikani, zogu më i madh në Europë.

Agjencia Kombëtare e Mjedisit nëpërmjet Laboratorit Analitik si dhe Institutit të Shëndetit Publik kryen monitorimin e këtyre liqeneve bazuar mbi parametrat e Direktivës Kuadër të Ujit dhe indeksit trofik, po ashtu dhe monitorimin mikrobiologjik  në plazhet e liqenit të Ohrit që shtrihen nga Lini- Pogradec-Tushemisht.

Ujërat e Liqenit të Ohrit vlerësohen me cilësi mezotrofike dhe oligotrofike, ndërsa ujërat e Liqenit të Shkodrës vlerësohen me cilësi mezotrofike.

Në plazhet e Liqenit të Ohrit vlerësohet se 50% e stacioneve janë – Cilësi e shkëlqyer, 37.5% – Cilësi e mire, 12.5% – Cilësi e mjaftueshme. Qëllim kryesor i AKM është vlerësimi i cilësisë së liqeneve dhe njëkohësisht dhënia e rekomandimeve për përmirësimin e situatës për të mbrojtur këto pasuri natyrore si dhe shëndetin publik.