Shoqata e Transportit Urban: Të rinisim aktivitetin ose do dalim në protestë

Shoqata e Transportit Urban dhe Interurban kërkon rinisjen e aktivitetit të saj dhe paralajmërojnë se nëse s’ndodh kjo gjë do t’a përshkallëzojnë qëndrimin e tyre deri në protesta kombëtare.

Përmes një deklarate për mediat, bëhet me dije se kjo shoqatë i ka dërguar një shkresë zyrtare kryeministrit të vendit Edi Rama dhe ministrave përkatës për qëndrimet e saj.

Në deklaratë theksohet se punonjësit e këtij sektori kanë tre muaj pa punë, ndërkohë që mbështetjen e vetme që kanë patur nga shteti ka qenë paga e luftës.

Deklarata e plotë:

Shoqata jonë, përfaqësuese  e operatorëve kombëtarë të Transportit të udhëtarëve, kërkon t’ju bëjë me dije lidhur me situatën aktuale të aktivitetit të Transportit si një prej sektorëve më të rëndësishëm në ekonominë tonë kombëtare. Përpjekjet tona kanë ndjekur njëra-tjetrën. Hapi yni i rradhës, është shkresa zyrtare e fundit dërguar Kryeministrit Rama  dhe ministrave përkatës, lidhur me qëndrimet tona sa i përket funksionimit të sektorit tonë post Covid-19! Aktiviteti ynë vazhdon i pezulluar nga masat e Covid-19, duke mos patur në të kaluarën e mos marrë mbështetje nga shteti në asnjë formë suporti, përveç të vetmes ‘pagë-lufte’, kur sapo u mbushën 3 muaj pa asnjë aktivitet. Ndërkohë në emisionin Opinion TV Klan të datës 04/06, kryeministri Rama deklaron se çdo aktivitet është hapur.

Kërkojmë dashamirësisht pasqyrimin nga ju të kërkesave tona, që ky biznes të mund të ketë një frymëmarrje në këtë situatë e moment tepër të vështirë, ku vijmë nga një e kaluar të lënë të braktisur dhe harruar  nga  strukturat kompetente shtetërore, përballë konkurrencës së pandershme e të paligjshme me flotat informale e jo vetëm. E ardhmja e aktivitetit tonë duket e zymtë. Ne kërkojmë të fillojmë aktivitetin e të vazhdojmë me korrektësi punën tonë në shërbim të qytetarëve shqiptarë, me shpresën se me të njëjtën korrektësi e standart, do t’na përgjigjen strukturat e shtetit të së drejtes në TE DREJTEN tonë! Në rast se kërkesat tona do të injorohen, ne do të jemi të detyruar të përshkallezojmë qëndrimet tona në nivel kombëtar.’ Ju faleminderit paraprakisht. Me shume respekt; Drejtuesit e shoqates se trasportit te udhetareve: Dashnor Memaj – Eneo Sulejmanaj.