Shqipëria vijon të mbajë vendin e fundit për cilësinë e ujërave të notimit, ku vetëm 16% e ujërave në vendin tonë janë të pastër.
Edhe në raportin e Agjencisë Europiane të Mjedisit për vitin 2024, bazuar në të dhënat e vitit 2023, Shqipëria renditet e fundit për cilësinë e ujërave të notimit.
Eksperti për digat, Erjon Kalaja, në analizën e tij për "MCN Live", thotë se sipas raportit ka një degradim me 25%, krahasuar me vitin e kaluar.
Ky raport është pjesë e raportimeve që qeveria bën për të monitoruar cilësinë e ujërave në plazhe.
Raporti specifikon dhe krahason plazhet në bazë të dy parametrave kryesorë që lidhen me sigurinë e notimit, të cilët janë: sanitari dhe cilësia e ujit.
Ndërkohë, nënkategori të tjera specifikojnë ndotjen nga ujrat e zeza dhe mbetjet si faktorë ndikues në cilësinë e ujërave të plazheve.
Raporti thekson se cilësia e ujërave të plazheve është duke degraduar, dhe që ndotja ka shënuar një rritje me 25% krahasuar me vitin 2023. Ky fenomen lidhet me zhvillimin urban, rritjen e numrit të turistëve dhe mungesën e infrastrukturës adekuate për trajtimin e ujërave të zeza, që ka ndikuar negativisht në cilësinë e ujërave.
Eksperti Kalaja rendit plazhet me ujërat më të ndotura, sipas specifikimeve të raportit.
Zonat me ujërat më të ndotura përfshijnë jugun e Shqipërisë, ku përfshihen plazhet e Ksamilit dhe Sarandës, si dhe plazhi publik në Vlorë dhe ai në Durrës.
Këto janë zona që kanë pasur zhvillime urbane të shpejta dhe probleme me trajtimin e ujërave të zeza. Kjo është një problematikë që duhet të zgjidhet, veçanërisht me fluksin e lartë të turistëve.
Nga ana tjetër, zona e Dhërmiut vazhdon të mbetet një nga zonat me cilësi të shkëlqyer të ujit, si dhe disa zona në veri të Shqipërisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
