Balliu: Martesat me kontratë një gjë e bukur. Nuk janë trend në Shqipëri, ndikon edhe mentaliteti

Avokatja Alesia Balliu duke folur në “Mcn Informacion” mbi martesat me kontratë i konsideruar ato një gjë të bukur, që i japin vlerë reale dashurisë.

Balliu vë në dukje se këto martesa me kontratë s’janë trend në Shqipëri, dhe këtu ndikon edhe mentaliteti, edhe mungesa e pasurisë.

“Për mendimin tim është një gjë shumë e bukur, pasi martesat me kontratë i japin një vlerë reale dashurisë dhe emocionit. Kanë si anën e mirë, si të keqe, por kjo bëhet për të mbrojtur pasurinë e njërit prej partnerëve. Kjo ka ekzistuar që në Romën e lashtë, thjesht në Shqipëri s’është shumë e përdorur, sepse shumica nuk zotërojnë ndonjë pasuri të madhe. Nuk është trend në Shqipëri, e verifikojmë edhe te certifikatat në gjendjet civile. Janë raste të pakta që kanë evoluar kohët e fundit. Mendoj që janë të dyja, mentaliteti, dhe mungesa e pasurisë. Janë martesa të destinuara për t’u zgjidhur me marrëveshje. Tradhtia është një nga arsyet kryesore të divorceve. Nuk më ka rastisur që fëmija të jetë pjesë e kontratës. Në Shqipëri jemi pak tradicional, dhe kur thuhet se do bëhet një kontratë paramartesore ajo thotë ‘ai s’më do’! Kështu e mendojnë në Shqipëri”.

E pyetur mbi target grupet e prirura për martesa të tilla, Balliu tha që janë ata që kanë një pasuri të konsiderueshme që kanë dëshirë të mbajnë gjënë që posedojnë.