Presidenti i Republikës, Ilir Meta, ka shtruar në Pallatin e Brigadave një darkë iftari me rastin e muajit të shenjtë të Ramazanit.
Të pranishëm në darkën e shtruar nga presidenti ishin kreu i KMSH, Haxhi Skënder Bruçaj, udhëheqës fetarë të bashkësive shqiptare, ambasadorë e përfaqësues diplomatikë, teologë e personalitete të ndryshme.
Presidenti Meta uroi besimtarët myslimanë për paqe e mirësi në shpirtin dhe familjet e tyre.
"Si çdo festë fetare te ne, muaji i Ramazanit është një mundësi, në të cilën shqiptarët shprehin vlerësimin ndaj Zotit si dhe vëllazërimin, mirëkuptimin dhe harmoninë ndër fetare që ekziston në Shqipëri. Në këtë ditë të 15-të të Iftarit do të doja së pari t’ju uroja gjithë besimtarëve myslimanë shqiptarë agjërim të mbarë, dhe të vlerësoj sakrificën e tyre në përkushtimin ndaj Zotit si dhe ndaj vlerave humane", tha Meta.
Kreu i shtetit gjatë fjalës së tij, theksoi se Ramazani është muaji i mirëkuptimit, paqes dhe i mëshirës hyjnore.
"Është muaji ku dalin në pah cilësitë më të mira njerëzore si bujaria, toleranca, durimi, shpirtmirësia si dhe respekti e dashuria për njëri tjetrin. Ramazani përcjell përherë mesazhe ngrohtësie për besimtarët dhe i fton ata për më shumë dhembshuri dhe bujari sidomos për të varfrit, familjet në nevojë, jetimët, të moshuarit dhe të vetmuarit", u shpreh presidenti.
Meta uroi që mesazhet e solidaritetit nga ky muaj i shenjtë të vazhdojnë edhe më tej të plotësojnë kërkesat e qytetarëve tanë për më shumë mundësi, paqe, solidaritet dhe drejtësi sociale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
