Hita në Qendrën e Monitorimit të Trafikut, kamera dhe radarë inteligjentë në shërbim të sigurisë rrugore

Drejtori i Përgjithshëm i Policia e Shtetit, Skënder Hita, zhvilloi një vizitë në Qendrën Kombëtare të Monitorimit të Trafikut, i shoqëruar nga drejtues të Departamentit për Rendin dhe Sigurinë Publike, si edhe nga drejtues të Policisë Rrugore.

Gjatë vizitës, delegacioni u prit nga Drejtori i Përgjithshëm i Autoriteti Rrugor Shqiptar, Ami Kozeli, së bashku me drejtuesit e qendrës së monitorimit.

Fokusi i takimit ishte forcimi i bashkëpunimit institucional për përdorimin e pamjeve të siguruara nga kamerat dhe radarët funksionalë në akset rrugore, si edhe nga pajisjet e reja që pritet të instalohen në vijim. 

Këto të dhëna do të përdoren jo vetëm nga Policia Rrugore për identifikimin dhe ndëshkimin e shkeljeve të qarkullimit, por edhe nga strukturat e tjera policore për rritjen e sigurisë publike, parandalimin e ngjarjeve kriminale dhe dokumentimin e tyre ligjor.

Në fjalën e tij, Hita theksoi rëndësinë e përdorimit të teknologjisë inteligjente dhe pajisjeve moderne në funksion të sigurisë rrugore. 

Sipas tij, minimizimi i kontaktit të drejtpërdrejtë mes efektivëve të Policisë dhe përdoruesve të rrugës do të ndikojë pozitivisht në rritjen e standardeve të sigurisë, si edhe në forcimin e imazhit të Policisë së Shtetit dhe të vendit.

Nga ana e tij Kozeli vlerësoi bashkëpunimin ndërinstitucional mes ARRSH-së dhe Policisë së Shtetit, duke nënvizuar se koordinimi i përbashkët do të sjellë përmirësim të monitorimit të trafikut dhe rritje të sigurisë në akset rrugore.

Në përfundim të takimit, palët ranë dakord që bashkëpunimi për shkëmbimin e pamjeve dhe të dhënave të finalizohet sa më shpejt, si edhe të realizohet kalibrimi i radarëve në rrugë dhe tunele, me qëllim përdorimin e tyre për verifikimin dhe ndëshkimin administrativ të shkeljeve rrugore.