Një situatë shqetësuese është denoncuar në emisionin investigativ “Xhadat”, ku qytetari Agim Roshkodol pretendon se është lënë në qiell të hapur pasi çatia e banesës së tij është shembur nga Inspektorati i Mbrojtjes së Territorit (IMT), pa i dorëzuar dokumentacionin përkatës ligjor. Roshkodol deklaron se është pronar i 1/4 së shtëpisë, konkretisht i katit të tretë. Sipas tij, më 19 shtator, IMT ka ndërhyrë për të shembur çatinë, pa i lënë asnjë akt konstatimi apo vendim zyrtar për prishjen. Për këtë arsye, ai iu drejtua emisionit “Xhadat” për të bërë publik rastin.
Banesa, sipas tij, ishte e vjetër dhe çatia kishte nevojë për riparim, pasi tjegullat nuk mbanin më ujin e shiut. Megjithatë, ndërhyrja e IMT-së, sipas pretendimeve të tij, e përkeqësoi situatën, duke e lënë objektin të ekspozuar ndaj reshjeve.
Gazetarët e “Xhadat” iu drejtuan Bashkisë Shkodër për një reagim zyrtar, por nuk morën përgjigje konkrete. Drejtori i medias, sipas tyre, shmangu përgjigjet me formulime të paqarta. Edhe pas disa përpjekjeve dhe pritjeve të gjata në ambientet e bashkisë, askush nuk dha një sqarim për rastin, me arsyetimin se strukturat ishin të angazhuara në terren për shkak të përmbytjeve.
Nga ana tjetër, drejtori i IMT Shkodër deklaroi se qytetari ishte njoftuar, por kishte refuzuar të firmoste dokumentet. Sipas tij, njoftimi ishte dërguar edhe me postë dhe më pas ishte vendosur poshtë derës së banesës. Ai shtoi se ndërhyrja nuk ishte e lehtë, pasi banorët kishin kundërshtuar dhe ishte dashur përdorimi i vinçave për realizimin e shembjes.
Ndërkohë, një zhvillim i rëndësishëm është fakti se IMT i është drejtuar gjykatës për të marrë leje për hyrje në objekt dhe vijimin e prishjes, por kërkesa është rrëzuar. Gjykata ka vendosur pushimin e saj, duke argumentuar se masa e kërkuar nuk mund të zgjidhet përmes sigurimit të padisë dhe se mund të shkaktonte dëme të drejtpërdrejta ndaj palës së paditur.
Pas ndërhyrjes, banesa u përmbyt nga reshjet, me ujë që depërtoi deri në katin e parë. Roshkodol ironizoi ndërhyrjen e bashkisë, duke thënë se çatia u mbulua me qese plastike, ndërkohë që vetë institucionet promovojnë ndalimin e tyre për arsye mjedisore.
Avokati Erald Aga u shpreh se ndërhyrja e institucioneve është kryer në shkelje të procedurave, pasi duhet të ishte hartuar më parë një raport mbi dëmet që mund të shkaktoheshin. Sipas tij, në raste të tilla dëmi i shkaktuar është shpesh më i madh se përfitimi dhe përgjegjësia bie mbi IMT dhe Bashkinë Shkodër, të cilat duhet të përllogarisin dhe kompensojnë dëmet.
Vetë qytetari shprehet i zhgënjyer dhe emocionalisht i rënduar, duke deklaruar se nuk e kishte menduar kurrë që institucionet do ta linin në një situatë të tillë. Ai pohon se ka kërkuar ndihmë edhe nga drejtues të bashkisë, por nuk ka marrë zgjidhje.
Pas ndërhyrjes së emisionit “Xhadat”, çatia e banesës është rindërtuar. Megjithatë, Roshkodol thekson se nuk është i kënaqur me mënyrën si u realizua procesi, pasi nuk pati asnjë komunikim apo marrëveshje me banorët dhe askush nuk mbajti përgjegjësi për dëmet e shkaktuara brenda banesës.
Në një reagim telefonik, zëdhënësja e Bashkisë Shkodër deklaroi se çatia tashmë është ndërtuar, por për sqarime të detajuara kërkoi dërgimin e një kërkese zyrtare. Ndërkohë, redaksia e “Xhadat” pohon se një kërkesë e tillë është bërë edhe më herët, por nuk ka marrë përgjigje.
Rasti ngre pikëpyetje të forta mbi transparencën dhe përgjegjshmërinë e institucioneve lokale në trajtimin e pronës private dhe mbrojtjen e qytetarëve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
