Shqipëria dhe Kosova kanë nënshkruar një marrëveshje bashkëpunimi që synon lehtësimin e punësimit të qytetarëve, rritjen e mobilitetit të fuqisë punëtore dhe forcimin e bashkëpunimit institucional në fushën e punësimit dhe formimit profesional.
Marrëveshja u firmos në Tiranë, nga ministrja e Ekonomisë dhe Inovacionit, Delina Ibrahimaj, dhe ministri për Punë, Familje dhe Vlerat e Luftës Çlirimtare i Republikës së Kosovës, Andin Hoti.
Marrëveshja krijon një kuadër të përbashkët bashkëpunimi për lehtësimin e punësimit të qytetarëve në Shqipëri dhe Kosovë, rritjen e mobilitetit të fuqisë punëtore, shkëmbimin e informacionit dhe praktikave më të mira, si dhe forcimin e kapaciteteve të institucioneve përgjegjëse për punësimin, aftësimin dhe formimin profesional.
Në fjalën e saj, ministrja Delina Ibrahimaj e cilësoi marrëveshjen një hap konkret drejt afrimit të mëtejshëm të dy vendeve në politikat e tregut të punës.
Ajo theksoi se përmes këtij bashkëpunimi do të afrohen më tej tregjet e punës të Shqipërisë dhe Kosovës, do të përmirësohen shërbimet për qytetarët dhe do të mbështeten bizneset që kanë nevojë për fuqi punëtore të kualifikuar.
Nga ana e tij, ministri Andin Hoti tha se marrëveshja përfaqëson një hap të rëndësishëm drejt krijimit të mundësive më të mëdha për qytetarët e të dy vendeve për të përfituar nga shërbimet dhe programet në fushën e punësimit dhe aftësimit profesional.
Ceremonia e nënshkrimit u zhvillua në praninë e zëvendësministrave dhe përfaqësuesve të institucioneve zbatuese të Shqipërisë dhe Kosovës.
Përpara nënshkrimit të marrëveshjes, delegacionet e dy vendeve zhvilluan edhe një takim dypalësh, ku diskutuan për thellimin e bashkëpunimit në fushat me interes të përbashkët.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
