Dita e dytë në Kinë pa asnjë rast të shënuar me Covid-19

Kina, për të dytën ditë, nuk ka regjistruar asnjë rast të ri me koronavirus.

Edhe pse janë deklaruar 39 raste të reja me Covid-19, autoritetet kineze thonë se janë raste të importuara nga jashtë vendit.

Gjithashtu, numri i vdekjeve në Kinë është ngadalësuar në mënyrë dramatike.

Kina, raportoi vetëm tre vdekje, duke e çuar numrin e përgjithshëm në 3 mijë e 248 viktima si pasojë e Covid-19.

Autoritetet kineze tashmë janë përqëndruar tek parandalimi i infeksionit që mund të transmetohet nga personat që vijnë nga jashtë Kinës.

Shumë studiues të huaj, por edhe autoritetet vendase mendojnë se parandalimi i përhapjes së virusit në Kinë, erdhi si rezultat i vendimit për të bllokuar dhe futur në karantinë qytete dhe shumë provinca.

Kujtojmë se lloji i koronavirusit të ri për herë të pare, u shfaq në qytetin kinez Uhan më 12 dhjetor 2019.

Pas shfaqjes së koronavirusit në qytetin Uhan ai u përhap për një kohë të shkurtër edhe në qytetet tjera të vendit, ndërsa Organizata Botërore e Shëndetësisë (OBSH) shpalli "situatë emergjente"./BBC/