Drejtuesi i Unionit të Gazetarëve Aleksandër Çipa deklaratat e Kryeministrit Edi Rama për mundësinë e mbylljes së Radio Televizionit Shqiptar, e sheh si opsion zyrtar, por që edhe si opsion e kundërshton.
Në një lidhje për “MCN Informacion” ai deklaroi se ka hapësira të mëdha për kritika dhe qëndrime ndaj brendisë së kësaj media, por u shpreh kategorikisht kundër mundësisë së privatizimit dhe dhënies me koncension të RTSH.
Sipas tij, media publike është pronë publike dhe askush nga pushtetet nuk mund të përdorë cilësinë e administratorit për ta nxjerrë me koncension apo PPP-të.
Nuk është propozim zyrtar opsioni i mbylljes së RTSH-së nga Kryeministri, por ne dhe si opsion e kundërshtojmë. Ka hapësira të mëdha për kritika, qëndrime dhe shumë reçenca për brendinë e medias publike, se fatkeqësisht nuk është publike në brendinë dhe misionin e saj. Së pari duhet të kesh mëvetësinë funksionuese.
Jemi kundër zgjedhjes së Këshillit Drejtues të RTSH-së. Privatizimi dhe dhënia me koncension e RTSH-së është kategorikisht refuzuese nga Unioni i Gazetarëve Shqiptarë. Media publike është pronë publike dhe askush nga pushtetet nuk mund të përdorë cilësinë e administratorit për ta nxjerrë me koncension apo PPP-të.
Vetë fakti që aty janë mbi 900 të punësuar, në këndvështrimin tonë ky është establishmenti i vetëm me kapitale të tilla. Aty është kolektivi më i madh profesional i investuar në më shumë se pesë dekada. Që do të thotë kontributi i investuar në historinë e kësaj medie, pavarësisht rezervave dhe kritikave që ndajmë, është një aset memorialistik që mbetet dhe pasuri në memorien e gazetarisë audiovizive në vend.
Këto e bëjnë të pamundur aktin e privatizimit dhe dhënies me koncension. Atributet e medias publike nuk mund ti ketë media private. Media publike nuk duhet të bëhet shtetërore dhe partiake dhe ne do e kundërshtojmë atë. Operatorët privatë kanë përdorur arkivet e medias publike e cila ka aset arkivor shumë të pasur.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
