Një 39-vjeçar është arrestuar pasi dyshohet se i vuri zjarrin katedrales në Nantë, me datë 18 korrik.
Ai ishte një vullnetar i Kishës dhe para autoriteteve franceze është shprehur se ka qenë personi që i vuri flakën Katedrales historike që daton që nga shekulli i 15-të.
Prokuroria ka thënë se 39-vjeçari, emri i të cilit nuk bëhet me dije nga autoritetet, ishte një azilkërkues që jetonte në Francë, prej disa vitesh.
Ai u arrestua ditën e shtunë për herë të dytë, pasi herën e parë ishte marrë në pyetje dhe ishte liruar për mungesë provash.
Prokurori i çështjes, Pierre Sennes, ka thënë se i dyshuari e ka pranuar se është përgjegjës për zjarrin që filloi në tre vende të ndryshme në Katedralen e Shën Pjetërit dhe Shën Palit.
Gjithashtu në një deklaratë, Sennes ka thënë se i dyshuari, akuzohet për “shkatërrim dhe dëme nga zjarri” dhe mund të dënohet me 10 vjet burg dhe një gjobë prej 175.000 dollarë.
Ndërkohë avokati i tij, Quentin Chabert, ka treguar se klienti i tij është penduar për veprimin që ka bërë.
Por ende nuk ka një motiv të qartë që e ka shtyrë atë drejt zjarrëvënies.
Kujtojmë se më shumë se një javë më parë katedralja e Nantes në Francë u përfshi nga flakët.
Alarmi u dha në orën 7 e 44 minuta, teksa 60 zjarrfikës punuan për shuarjen e flakëve dhe për të stabilizuar situatën.
Forcat e emergjencës deklaruan se zjarri brenda kishës së shekullit të 15 ishte në përmasa shumë të mëdha dhe se po avanconte në hapësira të ndryshme të saj.
Nuk ishte hera e parë që Katedralja e Nantes u përfshi nga flakët.
Në 28 janar të 1972 pati një zjarr aksidental, i cili e nxori jashtë funksionit katedralen deri në vitin 1985.
Zjarri në Nante erdhi një vit pas djegies së Katedrales së Notre Dame në Paris.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
