27 Janari, Dita Ndërkombëtare e Holokaustit

Më 27 janar bota përkujton Ditën Ndërkombëtare të Holokaustit, shpallur nga Asambleja e Përgjithshme e Kombeve të Bashkuara në vitin 2005.

Kjo datë përkon me çlirimin e kampit nazist të përqendrimit Auschwitz-Birkenau më 27 janar 1945.

Dita ka një rëndësi të veçantë, pasi përkujton milionat e viktimave të politikave të gjenocidit të Gjermanisë naziste, të cilat u realizuan gjatë Luftës së Dytë Botërore. Pjesa më e madhe e këtyre viktimave ishin hebrenj, të cilët u masakruan në mënyrë sistematike nga regjimi nazist.

Gjatë Luftës së Dytë Botërore, rreth gjashtë milionë hebrenj u vranë si pjesë e përpjekjes së organizuar naziste për të shfarosur popullsinë hebraike. Hebrenjtë nga e gjithë Gjermania dhe vendet e pushtuara europiane u grumbulluan në kampe përqendrimi, ku shumë prej tyre u helmuan me gaz, u qëlluan, apo u lanë të vdisnin nga uria.

Fjala "holokaust" vjen nga greqishtja e lashtë, ku do të thotë "sakrificë". Para Luftës së Dytë Botërore, ky term përdorej për të përshkruar vdekjen e një grupi të madh njerëzish.

Megjithatë, që nga viti 1945, "holokausti" ka shënuar përndjekjen dhe vrasjen sistematike të hebrenjve gjatë periudhës 1933-1945 nga nazistët dhe aleatët e tyre. Për hebrenjtë, ky ngjarje është njohur si “shoah”, që do të thotë “katastrofë”.

Një nga kontributet më të rëndësishme për shpëtimin e hebrenjve gjatë Luftës së Dytë Botërore ka ardhur nga shqiptarët.

Ata strehuan shumë hebrenj që kishin ikur nga vendet e tjera, ose që jetonin në Kosovë dhe Shqipëri, duke i mbrojtur dhe shpëtuar nga persekutimi nazist.