Pas takimit me farmacistët, Ministria e Shëndetësisë dhe Mbrojtjes Sociale, Ogerta Manastirliu thotë se këta të fundit janë tërhequr nga protesta e tyre lidhur me kundërshtitë që kishin për listën e re të barnave të rimbursueshme.
Dy palët kanë rënë dakort këtë të enjte pas takimit që është zhvilluar në ambientet e Ministrisë së Shëndetësisë mes ministres Ogerta Manastirliu dhe përfaqësuesve të Urdhrit të Farmacistëve Diana Toma.
“Bashkëpunimi është shumë i rëndësishëm dhe cdo shqetësim do të zgjidhet me dialog. Që nesër ju do të vijoni në grupe të përbashkëta punë me Fondin për të adresuar aty ku është e mundur shqetësimet e ngritura prej jush”, ka deklaruar Manastirliu gjatë takimit me Toma.
Sipas Ministrisë, përfaqësuesja e Urdhrit të Farmacistëve, në emër të farmacistëve, shprehu vlerësimin për gjuhën e bashkëpunimit që gjeti për zgjidhjen e problematikave të ngritura prej tyre sa i takon kontratave të reja mes farmacive dhe FSDKSH.
Më herët, para se të zhvillohej ky takim, në deklaratë për mediat, Urdhri i Farmacistëve kishte paralajmëruar një grevë dyorëshe për ditën e premte, por që nuk dihet nëse kjo do të mbahet pas takimit të sotëm me ministren.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
