17 tetor,​ Dita Ndërkombëtare e luftës kundër varfërisë

Sipas Kombeve të Bashkuara, 17 tetori i çdo viti shënon Ditën Ndërkombëtare për Zhdukjen e Varfërisë. Që prej vitit 1993, kjo ditë ndërgjegjëson njerëzit për nevojën e zhdukjes së varfërisë në mbarë botën dhe veçanërisht në vendet në zhvillim

Organizata të ndryshme joqeveritare dhe komunitetet e bamirësisë mbështesin këtë ditë duke u bërë thirrje drejtuesve dhe qeveritarëve që në agjendën e tyre lufta kundër varfërisë të ketë prioritet.

Në 17 tetor të vitit 1987, më shumë se 100 mijë persona u mblodhën në Paris për të nderuar viktimat e varfërisë ekstreme, dhunës dhe urisë.

Që prej atij momenti individë dhe organizatat në mbarë botën e shohin 17 tetorin si një ditë ku mund të rikujtohet  përkushtimi i tyre për t’i dhënë fund varfërisë.

Dita e luftës kundër varfërisë po festohet në një kohë kur pothuajse një miliard njerëz në mbarë botën po vdesin nga uria dhe po rritet numri i atyre që nuk kanë para as për nevojat elementare.

Gjithashtu vlerësohet se një e katërta e popullsisë në botë është jashtëzakonisht e varfër, duke jetuar me një dollar në ditë. Shqetësues është fakti se 2.6 milionë fëmijë vdesin çdo vit si pasojë e kequshqyerjes, që është një e treta e numrit të përgjithshëm të vdekjeve në botë.