Një person u vra dhe dy të tjerë u plagosën gjatë protestave masive që kanë shpërthyer në qytetin Kenosha në Wisconsin pas plagosjes së afro-amerikanit Jacob Blake, i cili u paralizua pasi u qëllua pas shpine nga policia.
Referuar deklaratave të familjes, Blake është i “paralizuar nga mesi e poshtë” dhe mund të humbasë përgjithmonë funksionimin e këmbëve.
“Ai do t’i nënshtrohet një operacioni me qëllim rikuperimin e nervit të dëmtuar”, u shpreh për mediat një i afërm i tij.
Nëna e 29-vjeçarit afro-amerikan, Julia Jackson, ndërkohë u ka bërë thirrje protestuesve të protestojnë paqësisht.
“Nëse Jakobi do të ishte i vetëdijshëm se çfarë dhune dhe rrëmujash kanë plasur në Kenosha, ai tani do të ndjehej shumë i mërzitur”, tha Jackson.
Kjo ngjarje vjen tre muaj pas protestave të dhunshme që tronditën vendin për afro-amerikanin, John Floyd, i cili u vra gjatë arrestimit të tij në Minesota.
Guvernatori i Wisconsin, Toni Evers ka shpallur gjendjen e jashtëzakonshme pas përleshjeve masive mes protestuesve dhe forcave policore.
Për të dytën ditë radhazi protesta të shumta kanë përfshirë SHBA-të, pasi të dielën policia e Wisconsin qëlloi me armë duke plagosur një person me ngjyrë, në kohën që ai po hipte në automjetin personal dhe teksa fëmijët e tij po shikonin ngjarjen nga makina.
E gjithë skena e rëndë u filmua me celular dhe u publikua në rrjetet sociale, duke shkaktuar një zemërim të qytetarëve të Kenoshës, për dhunën e pajustifikuar të policisë ndaj një personi të paarmatosur.
I riu u qëllua mbi 7 herë nga mbrapa me pistoletë, ndërsa efektivët e policisë kishin shkuar për ta arrestuar pas një telefonate për dhunë në familje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
