Një ndërtim pa leje është duke u kryer në një pallat në Yzberisht, në rrugën “Rexhep Shala”.
Denoncimi i banorëve për MCN TV thotë se ndërtimi pa leje po bëhet në pallatin “Aleksandros” në tarracën e pallatit dhe konkretisht në vendin që shërbente për ajrosje për banorët.
Mësohet se firma “MARATEB.Al” e administruar nga Ferit Gjergji, është duke ngritur një shtesë rreth kullës së ajrimit që del në pallat.
Sipas shqetësimit të banorëve, firma në fjalë ka marrë leje në njësinë administrative Kashar për punime që kryen brenda ambienteve të shtëpisë, dhe jo ndryshim strukture. Ata shtojnë se punimet kanë dëmtuar tarracën dhe se kateve të fundit iu pikon ujë.
Banorët shprehen se pikërisht në këtë pallat rreth gjashtë muaj më parë ra zjarr dhe se shpëtimi i tyre u bë i mundur, pikërisht nga tarraca e cila tashmë po betonizohet.
Në vijim, banorët thonë se shqetësimet e ngritura te Policia Bashkiake dhe Inspektoriati i Mbrojtjes së Territorit, nuk kanë ndaluar punimet dhe betonizimin e tarracës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
