Remdesiviri, një ilaç eksperimental antiviral, ka rezultuar i efektshëm në trajtimin e pacientëve me Covid-19.
Lajmi u bë i ditur të mërkurën nga kreu i Institutit Kombëtar për Alergjitë dhe Sëmundjet Infektive, doktor Anthony Fauci.
Kjo është hera e parë që një ilaç është treguar zyrtarisht se mund të përmirësojë rezultatet kundër virusit Covid-19, i cili ka shkaktuar më shumë se 200 mijë viktima në të gjithë botën, ndërsa ekonomitë e vendeve i ka futur në kolaps.
"Remdesiviri ka një efekt të qartë e të rëndësishëm pozitiv në zvogëlimin e kohës për t'u shëruar", u tha Fauci gazetarëve në Zyrën Ovale të Shtëpisë së Bardhë. "Ai është një ilaç që mund t’a bllokojë këtë virus”.
Fauci tha se pacientët që trajtoheshin me Remdesivir u duhej 11 ditë kohë për t’u shëruar krahasuar me 15 ditë që u nevojiteshin atyre pacientëve që u jepej placebo.
"Sa herë ka prova të qarta se një ilaç funksionon, kemi detyrimin etik që tua tregojmë menjëherë njerëzve që janë në grupin e atyre që trajtohen me placebo, që dhe ata të mund të kenë qasje. Provat e tjera që po kryehen tashmë me ta kanë një standard të ri të kujdesit", u tha Fauci gazetarëve.
Peter Horby, një epidemiolog në Universitetin e Oksfordit i cili nuk ishte i përfshirë në studim, tha: "Ne kemi nevojë për të parë rezultatet e plota, por nëse konfirmohet kjo do të ishte një rezultat fantastik dhe një lajm i shkëlqyeshëm për luftën kundër Covid-19".
Remdesiviri, një ilaç antiviral i prodhuar nga kompania amerikane “Gilead Sciences”, është një ilaç për përdorim intravenoz, që ndërhyn tek një enzimë që riprodhon materialin gjenetik viral.
Në testet e kryera tek kafshët kundër SARS-it dhe MERS-it, sëmundje të shkaktuara nga koronaviruse të ngjashme, Remdesiviri ka ndihmuar në parandalimin e infeksionit dhe uljen e ashpërsisë së simptomave.
Por ilaçi nuk është miratuar për përdorim të mundshëm nga asnjë vend në botë.
Covid-19 ka shkaktuar deri tani vdekjen e më shumë se 226,000 njerëzve në të gjithë botën, nga të cilët mbi 60 mijë në Shtetet e Bashkuara.
Numri i personave të infektuar në SHBA e tejkalojn të një milion vetët, më shumë se në çdo vend tjetër të botës.
Të mërkurën Presidenti Donald Trump la të kuptohet se shifra është "tregues i mundësive superiore testuese të vendit”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
