“Dita e Ashures”/ Baba Mondi thirrje për më shumë mirësi, paqe dhe dashuri mes njerëzve

Besimtarë bektashinj kremtojnë sot Ditën e Ashures, e cila cilësohet si ditë e rëndësishme në kalendarin e tyre fetar.

Në Kryegjyshatën Botërore të Bektashinjve është zhvilluar ceremonia e festës së “Ditës së Ashures”.

Kryegjyshi i Bektashinjve, Haxhi Dede Edmond Brahimaj, i është drejtuar pjesëmarrësve në ceremoni me një thirrje për më shumë mirësi, paqe dhe dashuri mes njerëzve.

Në këtë mënyrë të jetuarit së bashku në kulturën tonë, me vështirësitë që kjo botë po kalon, luftërat, vrasjet, pandemitë na mësojnë të ndajmë me njëri tjetrin, dashurinë, hidhërimin, pikëllimin dhe barrën e vështirësive që na sjell jeta.

Filloni nga ndërgjegjësimi i vetes suaj dhe bëni vetëm të mira. Bëni vetëm të mira dhe Zoti do t’ua shpërblej. Luftoni veset e këqija dhe duajeni jetën.

Shpirtrat e bardhë të dëshmorëve të Qerbelasë, na ofrojnë këshillën dhe virtytet e tij për të ecur në rrugën e së vërtetës në çdo koncept të jetës. Zoti na bekoftë të gjithëve, Amin!.

Fjala “ashura” vjen nga gjuha arabe dhe rrjedh nga rrënja “ashr” që në arabisht do të thotë dhjetë, ndaj “Dita e Ashures” është dita e dhjetë e muajit Muharem dhe tepër e rëndësishme sa i përket historisë së profetëve. Ashura konsiderohet si simbol i bereqetit, shpërndarjes dhe unitetit mes besimtarëve.

Sipas burimeve të hadithit, në këtë ditë ka shpëtuar nga përmbytja anija e Hazreti Nuhut dhe ngjarja kur profeti Musa kalonte nëpër Detin e Kuq dhe shpëtoi popullin e tij nga Faraoni.