Kosova do t’i japë Presidentit Trump medaljen më të lartë

Kosova do t’i akordojë Presidentit të SHBA-së, Donald Trump medaljen më të lartë për rolin e tij në arritjen e marrëveshjes mes Kosovës dhe Serbisë.

Agjencia e lajmeve Reuters shkruan se presidenti i Kosovës, Hashim Thaçi informoi Trump se ai do të marrë Medaljen e Kosovës për Urdhrin e Lirisë.

Në letrën e drejtuar Trump, ai i shpreh mirënjohjen e thellë për kontributin e tij personal në ndërmjetësimin e marrëveshjes.

Dy ndihmësit e Trump, këshilltari për sigurinë kombëtare Robert O’Brien dhe Richard Grenell, i dërguari special i SHBA për bisedimet Kosovë-Serbi, do të marrin Medaljen Presidenciale të Meritave.

Si pjesë e një marrëveshjeje të arritur në fillim të këtij muaji, Kosova dhe Serbia ranë dakord të punojnë për normalizimin e lidhjeve ekonomike.

Thaçi ftoi presidentin Trump të vizitoi Kosovën.

Kosova dhe Serbia më 4 shtator në Shtëpinë e Bardhë ranw dakord të zbatojnë një sërë marrëveshjesh të arritura tashmë, siç është ajo për autostradën mes Kosovës dhe Serbisë, ajo për hekurudhat dhe për linjën ajrore.

Kryeministri i Kosovës, Avdullah Hoti dhe presidenti i Serbisë, Aleksandar Vuçiç, në prani të presidentit të Shteteve të Bashkuara, Donald Trump, nënshkruan marrëveshjen për normalizim ekonomik.

Marrëveshja pasoi diskutimet ndërmjet liderëve të Kosovës dhe Serbisë që u zhvilluan më 3 shtator në Shtëpinë e Bardhë me ndërmjetësimin e këshilltarit për Siguri Kombëtare të Shtëpisë së Bardhë, Robert O'Brien, dhe të dërguarit të Posaçëm të presidentit amerikan për dialogun Kosovë-Serbi, Richard Grenell.

Me këtë marrëveshje, Kosova është pajtuar që brenda një viti të mos kërkojë anëtarësim në organizata ndërkombëtare, kurse Serbia në anën tjetër ra dakord që brenda një viti të ndalë fushatën për çnjohjen e pavarësisë së Kosovës.