Një grup shkencëtarësh të Universitetit të Pekinit në Kinë pretendojnë se kanë zhvilluar një ilaç që mund të parandalojë pandeminë e koronavirusit.
Ata thanë se ky ilaç që po testohet ka tregur se jo vetëm shkurton kohën e shërimit tek pacientët e infektuar me Covid-19, por edhe arrin të të mbrojë për një periudhë të shkurtër nga virusi.
Një prej tyre, Sunney Xie tha për AFP se ilaçi ka qenë i suksesshëm në fazën e testimit te kafshët.
“Kur injektuam antitrupa neutralizues në minj të infektuar, kuptuam se pas pesë ditësh ngarkesa virale u zvogëlua”, tha Xie.
Sipas saj, ky ilaç i mundshëm, mund të ketë efekt pozitiv tek personat e infektuar.
Mësohet se ilaçi përdor antitrupa neutralizues, të prodhuara nga sistemi imunitar i njeriut për të parandaluar virusin që mund të infektojë qelizat.
Studimi u botua në revistën shkencore “Cell” dhe sugjeron përdorimin e antitrupave si një “kurë” e mundshme për sëmundjen, duke shkurtuar gjithashtu edhe kohën e shërimit.
Kujtojmë se pas shfaqjes në Vuhan të Kinës në muajin dhjetor të vitit të kaluar, pandemia Covid-19 është përhapur në të gjithë botën.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
