1 tetori, Dita Ndërkombëtare e të Moshuarve

1 Tetori shënohet në mbarë botën si Dita Ndërkombëtare e të Moshuarve. 

Kjo datë u caktua më 14 dhjetor 1990 nga Asambleja e Përgjithshme e Kombeve të Bashkuara, si një ditë kushtuar njohjes dhe respektimit të kontributit të personave të moshuar në shoqëri.

Kjo nismë ndërkombëtare u parapri nga Plani Ndërkombëtar i Veprimit për Plakjen, i miratuar në vitin 1982 gjatë Asamblesë Botërore për Plakjen në Vjenë, dhe më pas u aprovua edhe nga Asambleja e Përgjithshme e OKB-së.

Për vitin 2025, Dita Ndërkombëtare e të Moshuarve mbahet nën temën: "Personat e Moshuar Nxisin Veprimin Lokal dhe Global: Aspiratat tona, Mirëqenia jonë dhe të Drejtat tona."

Kjo temë vë në pah rolin kyç që luajnë të moshuarit në ndërtimin e shoqërive elastike, gjithëpërfshirëse dhe të barabarta. Të moshuarit nuk janë përfitues pasivë të ndihmës sociale, por aktorë të rëndësishëm të ndryshimit dhe progresit. A

Sipas parashikimeve, numri i personave të moshuar në botë do të dyfishohet deri në vitin 2050, duke arritur mbi 1.5 miliardë njerëz. 

Të gjitha rajonet e globit pritet të përballen me rritje të ndjeshme të kësaj popullate, nga viti 2019 deri në vitin 2050.

Në këtë kontekst, është më e rëndësishme se kurrë që të promovojmë politika gjithëpërfshirëse dhe veprime konkrete që sigurojnë një moshë të tretë dinjitoze, aktive dhe të respektuar.