54 kamionë testojnë urën e re “Morandi” në Xhenova

Pas rreth dy vitesh nga shembja e urës “Morandi” në Xhenova të Italisë, ku humbën jetën 43 persona, inxhinierët zhvilluan testimet për urën e re.

Testimi i qëndrueshmërisë së urës u zhvillua me 54 kamionë që kaluan njëkohësisht mbi të.

Pesha e një kamioni ishte rreth 44 tonë, duke bërë që mbi urën e re të kishte njëkohësisht rreth 2500 tonë.

Ndërkohë, testimet do të vijojnë edhe gjatë ditës së hënë.

Me qindra punonjës e inxhinierë kanë punuar pa pushim që prej janarit të vitit 2019, për ringritjen e urës që shtrihet përgjatë një kilometri.

Punimet nuk u ndalën as nga përmbytjet e vitit të shkuar e as nga pandemia Covid-19, e cila gjunjëzoi Italinë.

Segmenti i fundit përfundoi në muajin prill.

I pari që përshkroi strukturën ishte drejtori ekzekutiv i kompanisë së ndërtimit “We Build", Pietro Salini, i cili deklaroi se kurrë më parë nuk kishte përjetuar një emocion të tillë.