Dita Ndërkombëtare për Çrrënjosjen e Varfërisë përkujtohet çdo vit më 17 tetor, si një thirrje botërore për të njohur dhe luftuar varfërinë ekstreme, një nga format më të rënda të shkeljes së të drejtave të njeriut.
Kjo ditë ka origjinën në vitin 1987, kur mbi 100 mijë njerëz u mblodhën në Sheshin e të Drejtave të Njeriut në Paris, për të nderuar viktimat e varfërisë ekstreme, dhunës dhe urisë. Gjatë këtij tubimi u shpall se varfëria është një shkelje e të drejtave themelore të njeriut dhe u bë thirrje për veprim global.
Në vitin 1992, Organizata e Kombeve të Bashkuara e njohu zyrtarisht 17 tetorin si Ditën Ndërkombëtare për Çrrënjosjen e Varfërisë, duke u bërë thirrje të gjitha shteteve anëtare që të forcojnë përpjekjet për reduktimin dhe zhdukjen e varfërisë në të gjitha format e saj.
Kjo ditë ofron një platformë për njerëzit që përjetojnë varfëri për të shprehur shqetësimet e tyre dhe njeh rolin e tyre vendimtar në luftimin e varfërisë.
Organizata të ndryshme jo qeveritare dhe komunitetet e bamirësisë mbështesin këtë ditë duke u bërë thirrje drejtuesve dhe qeveritarëve që në agjendën e tyre lufta kundër varfërisë të ketë prioritet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
