Kryhet transplanti i parë për mushkëritë e prekura nga Covid-19

Ekspertët e mjekësisë në Universitetin e Vjenës kanë kryer së fundmi me sukses një transplant të mushkërive të prekura nga koroanvirusi.

Mediat e huaja bënë me dije se ky është operacioni i parë ne Europë për sa i përket infeksionit Covid-19.

Lajmi fillimisht u bë i ditur nga një deklaratë për shtyp që dhanë mjekët. Ata u shprehën se pacienti 45 vjeçar i prekur nga Covid-19 nuk do të kishte mbijetuar ndryshe, ndërsa tani gjendja e tij shëndetësore po përmirësohet.

“Ne mendojmë se pacienti ka një gjendje shëndetësore të mirë dhe nuk ka shfaqur probleme të mëdha”, tha shefi i operacionit të klinikës, Walter Klepetko.

Klepetko tregoi se 45-vjeçari përpara se të prekej nga Covid-19, nuk vuante nga ndonjë sëmundje tjetër dhe ishte në një gjendje shëndetësore shumë të mirë.

Klinika e ka konsideruar operacionin për transplant si shumë të komplikuar, por të suksesshëm.

Ai tha se situata ishte e pashpresë, pasi mushkëritë ishin të bllokuara dhe nuk kishte asnjë mundësi tjetër përveç transplantit.

Sipas tij, të gjitha organet funksionojnë dhe ekimi mjekësor është shumë i kënaqur, por ne do të vazhdojmë t’a monitorojmë gjendjen shëndetësore të pacientit, derisa t’a nxjerrim nga spitali.