“Kim Jong Un është në gjendje kome, motra e diktatorit është vendosur në krye të shtetit”

Në Korenë e Veriut kushtet shëndetësore të Kim Jong Un vazhdojnë të mbahen të fshehura. Prej disa muajsh mediat ndërkombëtare kanë aluduar se diktatori mund të jetë i sëmurë. Pavarësisht kësaj, një bashkëpunëtor i ish-presidentit të Koresë së Jugut, Kim Dae Jung shkon edhe më tej duke deklaruar për median lokale se Kim Jong Un është në gjendje kome dhe duke pasur parasysh gjendjen e tij shëndetësore, diktatori i ka dhënë disa kompentenca motrës së tij; Kim Yo Jong.

“Jam i bindur se ai është në gjendje kome dhe ende nuk ka vdekur”, tha Chang Song-min për gazetarët. Song-min tha se zëvendësimi i plotë i tij ende nuk ka përfunduar, prandaj motra e tij e vogël ka dalë në plan të parë, sepse nuk mund të ketë një boshllëk të zgjatur të pushtetit.

Motra e Kim Jong Un po bëhet gjithnjë e më shumë një protagoniste e jetës politike në Korenë e Veriut dhe një gjë e tillë u kuptua ditët e fundit, kur u njoftua se diktatori filloi gradualisht t’i dorëzonte disa nga detyrat e tij të motrës me idenë për t’u lehtësuar nga stresi i krijuar.

Agjencia Kombëtare e Inteligjencës është shprehur se reforma në vazhdim nuk ka asnjë lidhje me problemet shëndetësore të Kim Jong Un.

Megjithatë, Chang Song-min mendon se asnjë udhëheqës i Koresë së Veriut nuk do të transferonte disa nga kompetencat e tij një personi tjetër, nëse nuk do të ishte i sëmurë apo nuk do të ishte rrëzuar nga pushteti përmes një grushti shteti.