Trump kundër Meghan: I uroj fat të mbarë Princ Harryt

Një video e re e publikuar nga Harry dhe Meghan për zgjedhjet presidenciale të 2020-ës në SHBA, ka ndezur një polemikë të madhe përtej Atlantikut.

Në mesazhin e tyre, shpërndarë nga ABC, Harry dhe Meghan, ftojnë amerikanët të votojnë “duke refuzuar gjuhën e urrejtjes dhe mizogjininë”.

Edhe pse ata në mesazhin e tyre nuk patën referenca specifike për kandidatët, megjithatë mesazhi i tyre ishte një thirrje e qartë për të votuar kundër presidentit në detyrë, Donald Trump.

“Mjaft me mesazhe urrejtje, dezinformuese dhe plot negativitet në internet”, deklaroi Harry.

Ndërsa, Meghan i përshkroi zgjedhjet e nëntorit si “zgjedhjet më të rëndësishme të jetës së tyre”.

Mirëpo, kur presidenti Trump u pyet për mesazhin në fjalë, ai i uroi “fat të mirë” Princit Harry dhe bashkëshortes së tij Meghan Markle.

“Ai do të ketë shumë nevojë për të”, tha kreu i Shtëpisë së Bardhë, duke nënkuptuar se nuk e pëlqen fare Meghan.

Iniciativa e tyre, gjithashtu “turpëroi” Pallatin e Buckingham, pasi Harry mbetet ende një princ britanik dhe në vazhdën e fronit dhe protokollit kombëtar kërkohet që anëtarët e familjes mbretërore të mos marrin pozicione politike.

Ndoshta, për këtë arsye, thirrjet për t’i privuar ata të dy nga të gjithë titujt mbretërorë janë shtuar së fundmi.

Përveç familjes mbretërore, e cila nuk e priti mirë për shkak se ajo kërkohet të jetë neutrale ndaj zgjedhjeve, reagime të shumta ka pasur edhe nga shumë qytetarë. 

 “Pse një Princ britanik dhe gruaja e tij janë përfshirë në zgjedhjet e Shteteve të Bashkuara? Çfarë kanë ata? “Pse një princ britanik do të inkurajonte qytetarët e SHBA-së që të votojnë në zgjedhjet e tyre? Si mund të lejohet kjo?”, kanë qenë disa prej komenteve. 

Protokolli ndalon Familjen Mbretëore të shprehi pikëpamjet politike në publik, por mesa duke Meghan dhe Harry tashmë e ndiejnë veten plotësisht jashtë rregullve të mbretërorëve.

Sjellja e pamatur e çiftit rrezikon të krijojë një krizë të vërtetë diplomatike me SHBA.