Në horizont duket një tjetër trajtim potencialisht shpëtimtar për të sëmurët me kancer.
Shkencëtarët kanë marrë virusin e herpesit dhe e kanë shndërruar atë në një aleat të fuqishëm në luftën kundër kancerit, njofton scencealert.com.
Një version i modifikuar gjenetikisht i virusit herpes simpleks, i quajtur RP1, ka treguar aftësi për të shkatërruar tumoret e avancuara të melanomës, edhe kur ato ndodhen thellë në trup, sipas rezultateve të një prove klinike të fazës 1/2.
Gjatë provës, RP1 u injektua në tumoret e melanomës, në sipërfaqe ose nën lëkurë, dhe në zona më të thella si mushkëritë apo mëlçia. Tek pacientët që iu përgjigjën trajtimit, u vu re tkurrje edhe në tumoret që nuk ishin injektuar drejtpërdrejt me virusin.
“Ky rezultat sugjeron se RP1 është efektiv në shënjestrimin e kancerit në të gjithë trupin, jo vetëm në tumorin e injektuar, gjë që rrit ndjeshëm potencialin e tij, pasi disa tumore janë të paarritshme”, shpjegon onkologu mjekësor Gino Kim In nga Universiteti i Kalifornisë Jugore.
Të nxitur nga këto rezultate premtuese, FDA në fillim të vitit i dha përparësi shqyrtimit të terapisë RP1, në kombinim me imunoterapinë nivolumab (e njohur ndryshe si Opdivo). Ky kombinim duket se i jep melanomës një goditje të dyfishtë.
Nga 140 pacientë të përfshirë në studim, rreth një e treta iu përgjigjën pozitivisht terapisë. Fillimisht, pacientët morën trajtimin e kombinuar çdo dy javë për tetë cikle, dhe më pas vazhduan vetëm me nivolumab deri në dy vjet.
Ndër ata që treguan reagim pozitiv, 80 deri në 90% e tumoreve u tkurrën me më shumë se 30%. Efektet anësore ishin të ngjashme si për injeksionet sipërfaqësore, ashtu edhe për ato në zona të thella të trupit.
Pavarësisht se është një version i virusit herpes, RP1 nuk shkakton infeksione herpes te pacientët, pasi është i modifikuar për të qenë i sigurt dhe për të aktivizuar sistemin imunitar kundër qelizave kancerogjene.
“Këto gjetje janë shumë inkurajuese,” thotë Dr. In. “Melanoma është kanceri i pestë më i përhapur tek të rriturit, dhe rreth gjysma e rasteve të melanomës së avancuar nuk reagojnë ndaj terapive ekzistuese. Mbijetesa për pacientët me melanomë të patrajtueshme shpesh është vetëm disa vjet. Kjo terapi e re sjell shpresë për ata që kanë mbetur pa alternativa.”
Viruset onkolitike si RP1 konsiderohen veçanërisht të dobishme për kancere të vështira për t'u trajtuar, si melanomat ose tumoret e trurit, që janë të mbrojtura nga një mjedis imunosupresiv.
Nëse efikasiteti i trajtimit konfirmohet, ai mund të bëhet shumë shpejt i disponueshëm për pacientët me melanomë të avancuar rezistente ndaj trajtimeve të tjera.
“Unë besoj se viruset onkolitike do të hapin një epokë të re në trajtimin e kancerit për shumë pacientë,” përfundon Dr. In.
Aktualisht është duke u zhvilluar një provë e fazës 3 me më shumë se 400 pjesëmarrës, ndërkohë që rezultatet paraprake u prezantuan në Takimin Vjetor të Shoqatës Amerikane për Onkologji Klinike (ASCO) 2025.
Ato ende nuk janë shqyrtuar nga kolegët, por ngjallin shumë pritshmëri në komunitetin shkencor.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
