Durrës/16 institucione arsimore bëhen bashkë në një marshim ndërgjegjësues në kuadër të Ditës së Tokës

16 institucione arsimore të Durrësit u bënë bashkë këtë të shtunë në një marshim ndërgjegjësues, në kuadër të Ditës Botërore të Tokës.

Me pankarta dhe thasë me mbeturina plastike nxënës, studentë, mësues e pedagogë u nisën paralelisht nga stacioni i trenit dhe shkolla “Olsi Lasko” për t’u takuar tek Ura e Dajlanit.

"Në Ditën e Tokës ne duhet të aktivizohemi që të mos e ndosim më ambientin me mbetje plastike, por t’jua dhurojmë shkollave e universiteteve dhe t’i kthejmë në mjete shkollore“- tha Laura Gjyli, përfaqësuese e lëvizjes “RiverCleanUp Albania”.

Ndërsa, dekani i Fakultetit të Biznesit, Shkëlqim Fortuzi u shpreh: “Ndryshimin duhet ta fillojmë nga vetja jonë, nga familja jonë për mbrotjen e tokës dhe detit nga ndotjet”.

Merita Kuçi drejtuese e shkollës 9-vjeçare "14 nëntori" risolli në vëmendje “pushtimin” e bregdetit të Durrësit nga mbetjet vetëm dy ditë më parë, si një “dëshmi e rëndësisë dhe vlerës për ruajtjen e mjedisit”.

Ky është aksioni i 22-të i organizuar nga “RiverCleanUp Albania” gjatë të cilit u mblodhën rreth 600 kg mbeturina plastike.

Marshimi u mbyll pranë bregdetit të Durrësit.