Komisioni Evropian miratoi një paketë 100 milionë euroshe për të mbështetur rehabilitimin dhe rindërtimin e Shqipërisë pas tërmetit të nëntorit 2019.
Financimi është pjesë e zotimit të përgjithshëm të Komisionit Evropian me vlerë 115 milion euro të bëra në Konferencën Ndërkombëtare të Donatorëve të mbajtur në fillim të vitit.
Komisioneri i Zgjerimit, Olivér Várhelyi, tha se unioni po përmbush zotimin me këtë fond.
“Me miratimin e kësaj pakete financiare prej 100 milion eurosh, Bashkimi Evropian po realizon përkushtimin e tij për të ndihmuar Shqipërinë në përpjekjet e rindërtimit pas tërmetit, ashtu si ne gjithashtu jemi duke mbështetur vendin për të adresuar pasojat e krizës COVID-19. Ne kemi realizuar premtimin tonë për t’u qëndruar pranë qytetarëve të Shqipërisë dhe kemi rinovuar mbështetjen tonë për Shqipërinë dhe të ardhmen e saj evropiane”, tha Várhelyi.
Programi i sapo miratuar do të përqendrohet në rehabilitimin dhe rindërtimin e objekteve arsimore, përfshirë mobiljet dhe pajisjet, për t’i lejuar fëmijët dhe të rinjtë të kthehen në shkollë me kushte dhe lehtësira më të mira.
Ai do të bazohet në punimet e nisura tashmë nën programin ekzistues të rindërtimit 15 milion euro të financuara nga Komisioni Evropian. Programi i ri do të financojë më tej rehabilitimin e vendeve të dëmtuara të trashëgimisë kulturore, përfshirë monumentet, muzetë, bibliotekat dhe vendet arkeologjike, duke kontribuar në këtë mënyrë edhe në zhvillimin ekonomik lokal.
E gjithë ndërtimi do të ndjekë parimin “Ndërto më mirë”, duke zbatuar norma të qëndrueshme ndërtimi dhe të zvogëlojë rrezikun e ardhshëm, duke rindërtuar infrastrukturë dhe sisteme më të forta, më të sigurta dhe më rezistente ndaj katastrofave. Masa speciale gjithashtu do të sjellë përmirësime në efikasitetin e energjisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
