Shtatë turistët spanjollë të cilët mbetën të bllokuar pasditen e djeshme në kanionin e Nivicës janë shpëtuar nga policia.
Në vendin e quajtur “Ujëvara e Peshturës”, 7 turistët spanjollë që po eksploronin zonën, duke zbritur me litar në thellësinë e kanionit të Nivicës, mbetën të bllokuar në kanion, për shkak të terrenit shumë të vështirë.
Menjëherë pas marrjes së njoftimit, shërbimet e Komisariatit të Policisë Tepelenë dhe shërbimet zjarrfikëse, u nisën në drejtim të zonës ku kishin mbetur të bllokuar turistët.
Fillimisht, ata kontrolluan zonën me dron dhe bënë të mundur lokalizimin e turistëve, në kanionin e Nivicës.
Pas disa orësh operacion kërkim-shpëtimi, në një terren shumë të vështirë dhe të rrezikshëm, shërbimet e policisë, si rezultat i punës së mirorganizuar dhe i bashkëpunimit me shërbimet zjarrfikëse, kanë bërë të mundur nxjerrjen e 7 turistëve spanjollë, nga terreni i vështirë ku kishin mbetur të bllokuar.
Turistët u transportuan nga shërbimet e policisë dhe u akomoduar në një bujtinë, në fshatin Dukaj, në gjendje të mirë shëndetësore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
