Në dy metra largësi nga njëri-tjetri dhe të veshur me maska fytyre, mijëra izraelitë protestuan të dielën kundër kryeministrit Benjamin Netanyahu, ndërsa respektonin rregullat e distancimit fizik nga frika e përhapjes së virusit Covid-19.
Organizatorët e protestës kishin shënuar pika në shesh për të respektuar rregullat e distancës fizike dhe për të orientuar protestuesit gjatë qëndrimit të tyre në këmbë.
Netanyahu po tenton të negociojë një marrëveshje me rivalin e tij politik, Benny Gantz, me qëllim formimin e një qeverie koalicioni.
Protestuesit i bënë thirrje Gantz që të refuzojë marrëveshjen me Netanyahu, pasi ky i fundit akuzohet për tri afera korruptive dhe mbi të gjitha qytetarët e kritikojnë për mosveprim të shpejtë ndaj pandemisë Covid-19, duke përfshirë edhe gjurmimin telefonik të qytetarëve nga agjencitë e inteligjencës.
“Ne po luftojmë për gjithçka dhe gjithçka është thelbësore për të ardhmen e këtij vendi dhe të fëmijëve tanë. Demokracia në Izrael është e rëndësishme, por edhe mënyra se si kjo qeveri po i përgjigjet krizës së krijuar nga pandemia Covid-19”, u shpreh për Reuters, Yair Lapid, deputet i opozitës.
Izraeli ka raportuar më shumë se 13 mijë raste me Covid-19 dhe 172 viktima, pavarësisht se Netanyahu njoftoi të dielën se disa nga masat për bllokimin e vendit do të lehtësoheshin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
