Shehu: Situata më e rëndë se në mars, Shqipëria në “listën e zezë” të OBSH

Ish-deputeti i PD, Tritan Shehu ka akuzar sërish qeverinë se ka dështuar në menaxhimin e pandemisë e për pasojë sipas tij Shqipëria është futur në “listën e zezë” të OBSH.

Në një status në Facebook, Shehu tregon se në 24 orët e fundit, Shqipëria ka shifra më të larta të pandemisë se Italia në raportin për 1 milion banorë.

Sipas tij kjo ka si shkak mos aplikimin e masave inteligjente nga ana e qeverisë të cilën e akuzon se po “fshihet” dhe kreun e saj, Rama, se po fajëson qytetarët.

Reagimi i Tritan Shehut

Rama me heshtjen nuk mund të fsheh dështimin ndaj Covid!

Shqipëria mbas teatralitetit e keqmenaxhimit të “mbylljes e hapjes” është në një situatë më të rëndë epidemiologjike se në mars, me një humbje gjigande ekonomike, e vendosur në “listën e zezë” të OBSH-së, kur sot duhet të kishim “dalë” siç ndodh me vende që u goditën tragjikisht.

Për të kuptuar këtë le të krahasojmë me Italinë disa të dhëna për dje (për 1 milion banorë):

Shqipëria           Italia

Raste të reja                   21,7                  2,5

Vdekje                               0,85               0,1

Në reanimacion               4,6                 1,4

Raste të reja/shëruar      1,22               0,1

Pra ndërsa Italia me masat inteligjente e një ecuri konstante “doli”, ne vazhdojmë të zhytemi në errësirë e izolim ndërkombëtar duke pasur:

-Shtim të frikshëm të rasteve e vatrave te reja, shtrimeve, vdekjeve, numër të vogël të shëruarish, etj.

-Kolaps e kthim në “qendra” kontaminimi të institucioneve shëndetësore të pa mbrojtura.

-Mjekun e familjes të paralizuar.

-Numrin e testimeve më të voglin në Europë, monopol pa transparencë të një laboratori me pasojë atë kurbe të pabesueshme.

-Popullësinë të papajisur me maska.

-Mungesë të një strategjie “mbrojtëse e dalëse”, etj.

Ky është një dështim i plotë i kësaj qeverie me pasoja tejet negative, që kërkojnë “masa inteligjente”.

”Fshehja” e Kryeministrit, tendenca për të fajësuar popullësinë, kërcënimet me “mbyllje”, as e çfajësojnë atë e as përmiresojnë ndonjë gjë, përkundrazi.