Maturantët sot në provimin e fundit, testohen në Lëndët me Zgjedhje

Ditën e sotme rreth 34 mijë maturantë do t’i nënshtrohen provimit të fundit të Maturës Shtetërore, ku do të testohen për Lëndët me Zgjedhje.

Provimi i lëndës me zgjedhje do të zhvillohet në orën 10:00 dhe përfundon në orën 12:30.

Edhe këtë vit maturantët zbatuan rregullat anti-COVID, kjo për shkak të situatës pandemike në të cilën ndodhemi.

Në mënyrë kategorike është i ndaluar përdorimi i telefonit gjatë zhvillimit të provimit dhe nëse identifikohej e kundërta maturanti duhet të mbante përgjegjësinë e veprimeve të veta.

Testi në total ka 60 pikë dhe pragu i kalueshmërisë është 25% (15 pikë).

Maturantët kanë kryer më herët, pra me 3 qershor provimin e Gjuhës së Huaj, për të vazhduar më datë 7 qershor me Gjuhën shqipe, me Matematikën më 11 qershor dhe ditën e sotme me provimin e lëndës me zgjedhje.

Kujtojmë se në përfundim të provimit të Matematikës, maturantët kanë reaguar me protesta, pasi u shprehën se hasën vështirësi në zgjidhjen e tezës dhe shumë gjëra nuk i kishin bërë duke marrë parasysh që viti shkollor ka funksionuar më së shumti online për shkak të pandemisë. 

Maturantët mbyllin sot ciklin e provimeve për të vijuar me aplikimet në universitet.