Të shumtë janë qytetarët që në takimet me kryeministrin Edi Rama të flasin për shqetësimet dhe problemet me të cilat ata përballen në zyrat e shtetit. Por kreu i qeverisë është gjendur pak ngushtë, kur një banore gjatë takimit në Rrëshen ka marrë fjalën dhe ka folur për hallin e saj.
Ajo i ka thënë kryeministrit një problem që shumë të sëmur po e vuajnë, pasi sipas saj është e prekur nga kanceri i gjirit, por që prej muajit gusht të 2017 nuk merr dot mjekim me herceptinë, pasi nuk ka ilaçi. Me profesion mësuese, gruaja i është drejtuar Ramës duke i thënë se po i paraqesin një realitet tjetër për shëndetësinë, pasi në të vërtetë situata është shumë e rëndë.
“Unë vuaj nga kanceri i gjirit. S’ka ilaç hereceptinë në Onkologjik, për mua dhe për 130 të sëmurë të tjerë dhe kjo situatë vijon prej muajsh. Nuk kam asnjë vërejtje për mjekët kanë qenë shumë të përkushtuar. Kam muaj që kërkoj drejtorin e spitalit për t’i kërkuar informacion, por nuk e gjej asnjëherë. Që nga mjekja ime dhe të gjitha instancat më thonë se nuk ka ilac. Deri tani duhet të kisha bërë 8 kura por kam bërë vetëm 3”, u shpreh ajo.
Më pas Rama ka marrë fjalën, dhe e ka sqaruar se është në dijeni të kësaj situate, duke shtuar se problemi qëndron te buxheti, pasi nuk ka fonde për të blerë ilaçe.
“E njoh shumë mirë situatën në Onkologjik. Nuk është faji i drejtorit sepse edhe po ta takoje nuk është se do të kishte mundësuar dhënien e ilacit. Problemi qëndron tek fondi dhe parashikimi vjetor i buxhetit për blerjen e medikamenteve. Ka një rritje të lartë të numrit të të sëmurëve me kancer nga viti në vit. Problemi qëndron edhe tek pamundësia buxhetore, e di ky nuk është një justifikim. Buxheti i ri do të mësojë blerje të një sasie më të madhe medikamentesh për trajtimin e sëmundjeve kancerogjene. Do ndryshojmë edhe ligjin për lerjen e medikamenteve në sasi më të mëdha që të shkojnë më shumë se një vit”, tha Rama.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
