Matura Shtetërore, Kushi: Përshpejtohet dhënia e diplomave, testet nga mësues me përvojë

Ministrja e Arsimit dhe Sportit, Evis Kushi bëri një analizë të Maturës Shtetërore 2021, si dhe nënvizoi masat e marra për mbarëvajtjen e Maturës Shtetërore 2022, gjatë interpelancës në Parlament, të kërkuar nga deputetja demokrate Ina Zhupa.

Kushi tha se pavarësisht problematikave dhe sfidave më të cilat u përballën, kalueshmëria në të gjitha lëndët ishte shumë e lartë, mbi 98%.

Ajo shtoi se aplikimi i metodës së korrigjimit të pyetjeve me alternativa nëpërmjet sistemit elektronik eliminoi gabimet njerëzore, si dhe shkurtoi kohën dhe rritjen e cilësisë së korrigjimit.

Gjatë analizës së Maturës Shtetërore ministrja Kushi tha se nga viti i kaluar u konstatua që hartimi i testit ishte aspekti më problematik i të gjithë procesit. Ndaj këtë vit është vendosur që hartimi i fondit të pyetjeve të kryhet në kushte shumë të larta sigurie për çdo test përfundimtar të lëndëve, printimin, shumëfishimin dhe paketimin e tyre.

Sipas Kushit, grupi i hartuesve të testeve do të jetë i përbërë nga mësues me përvojë, me integritet të lartë të përzgjedhur sipas një procesi të hapur dhe transparent do të punojnë për formulimin e pyetjeve. 

Kushi tha se diplomat e Maturës Shtetërore këtë vit do të lëshohen deri në 5 korrik për maturantët që do të studiojnë jashtë vendit, si dhe deri në 15 korrik për të gjithë maturantët.

Ministrja shtoi se po punohet për rishikimin e të gjithë procesit të Maturës Shtetërore për vitet e ardhshme, përfshirë edhe aktet nënligjore apo rregullatorë, nëpërmjet një grupi pune, i cili deri në fund të muajit mars do të prezantojë gjetjet.

Më pas do të hapet një tjetër proces konsultimi për të marrë vendimet e duhura nëse janë të nevojshme ndryshime më të thella.

Kushi tha se por në çdo rast, për çdo ndryshim nëse do të ketë, do t’i jepet maturantëve koha e nevojshme për tu përgatitur.

Ministrja tha se risi për këtë vit është se procesi i vlerësimit të testeve do të mbikëqyret edhe nga grupe pune të ngritura nga MAS, duke garantuar cilësi më të lartë vlerësimi.