Pandemia Covid-19, dy të vdekur në 24 orët e fundit në Kosovë

Dy qytetarë kanë humbur jetën dhe 46 raste pozitive me Covid-19 janë evidentuar në 24 orët e fundit në Kosovë.

Lajmi bëhet i ditur nga Instituti Kombëtar i Shëndetësisë Publike të Kosovës (IKSHPK).

Autoritetet kanë kryer në orët e fundit 560 teste të dyshuara, ndërsa numri i viktimave që nga fillim i pandemisë ka shkuar në 619.

Listës së të shëruarve i janë shtuar edhe 77 pacientë të rinj, duke e çuar numri e përgjithshëm në 13 165.

Rastet pozitive ditore në komunat e Kosovës:

Komuna Prishtinë 21 raste, komuna Drenas 3 raste, komuna Ferizaj 3 raste, komuna Fushë Kosovë 3 raste, komuna Suharekë 3 raste, komuna Vushtrri 3 raste, komuna Gjilan 2 raste dhe me nga një rast komunat Deçan, Gjakovë, Kamenicë, Mitrovicë, Pejë, Prizren, Shtërpcë dhe Viti.

Ministria e Shëndetësisë ka ftuar qytetarët të tregojnë kujdes, të ruajnë distancën, të përdorin maskë në ambiente të mbyllur, të shmangin grumbullime në ato vende, të cilat janë konsideruar shqetësuese për përhapjen e pandemisë së Covid-19.

Qeveria e Kosovës vendosi të premten të miratojë ndryshime të tjera në masat anti-Covid, ndërsa kaloi dhe fondin e pagave për orët shtesë të punonjësve të shërbimit publik.