Në Kosovë mbi 10 mijë persona të varur nga droga, 5 mijë nga kokaina

<p>Në Kosovë, numri i përdoruesve të lëndëve narkotike është rritur dukshëm. Instituti “Labyrinth”, të cilit i referohet <a href="https://zeri.info/kronika/540507/ne-kosove-mbi-10-mije-persona-te-varur-nga-droga-5-mije-nga-kokaina/">Zëri.info</a>, raporton se në total, Kosova ka rreth 40 mijë përdorues të drogave të ndryshme.</p> <p>Por ajo që bie në sy më shumë është ulja e moshës së përdoruesve, të cilët janë kryesisht 25-vjeçarë. Rreth 10 mijë përdorues të drogës janë të varur dhe e përdorin drogën për çdo ditë.</p> <p>“Ne kemi kategorinë përdorues problematik. Përdorues problematik janë ata të cilët e përdorin (drogën) në baza ditore të cilët janë të varur nga droga të cilët janë në konflikt me ligjin kanë probleme. <strong><em>Janë duke e kaluar 10 mijëshin kjo kategori</em></strong>,” thotë Safet Blakaj nga Instituti “Labyrinth”.</p> <p>Shifrat tregojnë një rritje të përdoruesve të kokainës.</p> <p>“<em><strong>Kokaina po e kalon gjysmën e tyre, pra mbi pesë mijë (përdorues)</strong></em>. Alarmante nuk e kisha quajtur, është shqetësuese sepse janë duke e përdorur në baza ditore dhe kjo paraqet problem.”</p> <p>Megjithatë, statistikat e policisë së Kosovës për vlerën e drogës së konfiskuar tregojnë një pamje tjetër. Në vitin 2024, sipas shifrave zyrtare, janë konfiskuar gati 19.5 kilogramë heroinë, 992 gramë kokainë, 103 kilogramë marihuanë dhe rreth 25 bimë kanabisë.</p> <p>Për këtë sasi të drogës dhe lloje të tjera janë arrestuar 209 persona.</p> <p>&nbsp;</p>