Një prej grave naftëtare e cila ishte në grevë urie në Ballsh është përkeqësuar dhe është detyruar të ndalë vetësakrifikimin e saj. Për këtë arsye, naftëtarja e quajtur Silva Ferizaj, është dërguar me urgjencë në spitalin e Ballshit ku po merr edhe ndihmën mjekësore.
Ky lajm vjen pak pasi sindikata e naftëtarëve të Shqipërisë publikoi një letër nga Sindikata Ndërkombëtare IndustriALL Global Union drejtuar kryeministrit Rama. Sipas kësaj letre, ata i kërkojnë shtetit shqiptar që të ndërhyjnë sa më parë në zgjidhjen e çështjes së naftëtarëve për pagat e prapambetura si dhe për fillimin e punës.
"Sindikata ndërkombëtare IndustriALL Global Union që përfaqëson miliona punëtorë në sektorët e minierave, energjisë dhe manifakturës, i ka nisur një letër kryeministrit Edi Rama dhe qeverisë së tij që të ndërhyjë në mënyrë që të paguhen pagat e prapambetura të naftëtarëve. Ata i rikujtonë Ramës se edhe pse e kanë kontaktuar për të njëjtën problematikë në muajin prill, nuk ka pasur zhvillime pozitive. Për IndustriAll është e papranueshme situata e krijuar dhe presin zgjidhje të menjëhershme. Naftëtarët e bashkuar kanë për të fituar!" - shkruan sindikata e naftëtarëve në Shqipëri.
Sot është dita e dhjetë e grevës së grave naftëtare, të cilat presin një zgjidhje për pagat e prapambetura si dhe vënien në punë të rafinerisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
