Kontrolli i Lartë i Shtetit deklaron se Ministria e Drejtësisë si institucioni epror i Komitetit Shqiptar të Birësimeve, nuk është angazhuar për interesin më të lartë të fëmijës gjatë procesit të birësimit.
Si kryhen Birësimet në Shqipëri, A ruhet i plotë dokumentacioni, A mbahet një arkiv dhe a arrihet qëllimi i plotë për ti dhënë një shans të dytë fëmijëve?
Këto janë pyetjet dhe arsyet përse Kontrolli i Lartë i Shtetit ka zbarkuar sipas një plani auditimi në zyrat e ministrisë së drejtësisë dhe Komitetit Shqiptar të Birësimeve.
Emisioni “FactCheck” në MCN është ndalur tek raporti prej 67 faqe i auditmit ku nuk mungojnë momentet që ngrenë një alarm për këtë proves.
Ja se çfarë thotë KLSH që në nisje të raportit “Komiteti Shqiptar i Birësimit gjatë fazës së terrenit është treguar i gatshëm dhe i hapur ndaj grupit të auditimit duke vendosur në dispozicion dokumentet e kërkuara sipas afateve të përcaktuara nga grupi i auditimit. Përgjithësisht komunikimi ka qenë korrekt dhe bashkëpunues”.
Ndalur tek Institucioni Epror i Komitetit Shqiptarë të Birësimeve, Ministria e Drejtësisë KLSH thotë “nuk ka arritur të përmbush plotësisht të gjitha kërkesat për informacion e dokumentacion të grupit të auditimit. MD ka patur vështirësi në identifikimin e strukturave përgjegjëse për monitorimin dhe mbikëqyrjen e KSHB-së, si dhe në gjetjen e dokumentacionit të veprimtarisë së komisionit të miratimit të agjencive të huaja ndërmjetësuese dhe raportimeve të KSHB-së te Ministri. Kjo situatë ka bërë që dokumentacioni dhe informacionet e dorëzuara të mos jenë të plota dhe të vëna në dispozicion në afatin e kërkuar”.
Pyetja kryesore: A kanë garantuar institucionet përgjegjëse interesin më të lartë të fëmijës gjatë procesit të birësimit?
Përgjigja e Audituesve të KLSH është kjo “Institucionet përgjegjëse për birësimin në Shqipëri nuk kanë garantuar zbatimin e bazës ligjore dhe nënligjore në fuqi, si parakusht për mbrojtjen e interesit më të lartë të fëmijës përgjatë procesit të birësimit vendas dhe ndërvendas, duke cenuar procesin e duke mos reflektuar në shkallën më të lartë parimet themelore të sanksionuara në Konventën për Mbrojtjen e Fëmijëve dhe Bashkëpunimin në lidhje me Birësimin Ndërvendas”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
