Nis vaksinimi kundër gripit të stinës, 260 mijë doza në të gjithë vendin

Vaksinimi kundër gripit të stinës ka nisur në të gjithë vendin. Ministria e Shëndetësisë bën të ditur se 260 mijë doza janë shpërndarë në gjithë Shqipërinë.

Nga Qendra Shëndetësore nr.1 në Tiranë, ministrja e Shëndetësisë dhe Mbrojtjes Sociale, Albana Koçiu, bëri thirrje që sidomos personat që konsiderohen grupe risku të bëjnë dozën e vaksinës kundër gripit.

“Janë 260 mijë doza vaksinash që janë siguruar për të gjitha qendrat shëndetësore në mbarë vendin. Instituti i Shëndetit Publik së bashku me Operatorin e Shërbimeve të Kujdesit Shëndetësor janë duke mundësuar shpërndarjen pranë mjekëve të familjeve, duke diagnostikuar gjithë grupet e riskuara. Janë të ftuar, dhe u bëj thirrje që t’u drejtohen qendrave shëndetësore me qëllim që të bëjnë dozën e vaksinës kundër gripit”, u shpreh Ministrja Koçiu.

Në grupin e personave të rrezikuar bëjnë pjesë individët e moshës së tretë mbi 60 vjeç, Fëmijët nga 6 muajsh deri në 12 vjeç, gratë shtatzëna, personat me sëmundje kardiovaskulare, personat me sëmundje pulmonare apo astëm bronkiale, diabetikët, personat me sëmundje kronike të mëlçisë ose veshkave, të sëmurët me tumor/kancer, personat obezë, personat me imunitet të dobët, etj.