“Bioteknologjia dhe gjenetika, zhvillimet dhe sfidat e së ardhmes” titullohej konferenca e parë shkencore ndërkombëtare, e zhvilluar sot nga Akademia e Shkencave të Shqipërisë.
Në konferencë ishin përfshirë mbi 200 kontribues me prani fizike dhe online me pjesëmarrjen e 70 referuesëve nga Shqipëria, Austria, Egjipti, Franca, Holanda, Gjermania, Libani, Emiratet e Bashkuara Arabe, Greqia, Kosova, Maqedonia, Italia.
Kryetari i Akademisë së Shkencave, Skënder Gjinushi, tha se “Ngritja e njësisë së Biogjenetikës është një përvojë e re në praktikën e funksionimit të ASH-së, e mundësuar në bazë të ligjit të ri, që tregoi në këtë hark kohor efikasitetin, ashtu si dhe simotrat e saj: njësia e nanoteknologjisë e quajtur NANO-ALB, njësia e gjeofizikës e sizmologjisë apo ajo e inteligjencës artificiale”.
“Nëpërmjet saj ASH-ja ka mundur t’iu përgjigjet si problemeve akute që dolën e dalin para shkencës e institucioneve shëndetësore, siç ishin e janë shumë problematika e pikëpyetje që lidhen me pandeminë e shkaktuar nga Covid-19, ashtu edhe problemeve të perspektivës, që lidhen me zhvillimin e shkencës së bioteknologjisë dhe të gjenetikës në tërësi”, – tha Gjinushi.
Sipas tij, njësia e biogjenetikës dhe komisionet përkatëse të ASH-së, kanë krijuar tashmë një lidhje e komunikim me njësitë e angazhuara e të specializuara në këtë fushë të shkencës te ne.
“Në sajë të këtij bashkëpunimi e ndërveprimi ne kemi tashmë një tablo të qartë mbi nivelin e kërkimit shkencor e të stafeve akademike përkatëse në fushat e nëndegët e lidhura me bioteknologjinë e gjenetikën, si dhe mbi masat që duhen ndërmarrë e hapat që duhen hedhur, për të rritur performancën e nivelin e kërkimit në këtë drejtim të shkencës e dijes”, u shpreh Gjinushi.
Kjo, vijoi Gjinushi, ka përforcuar idenë e domosdoshmërisë së fuqizimit të njësisë së biogjenetikës, duke e ngritur në nivelin e një qendre elitare të kërkimit.
“Siç dihet, pranë saj është bashkuar edhe ish-laboratori i imunologjisë, që sigurisht ndihmon në realizimin e disa projekteve, që lidhen me çështje të imunitetit të fituar ndaj COVID-19, nëpërmjet rënies në kontakt me virusin në mënyrë natyrale apo vaksinimit nga vaksina të ndryshme, por që është i pamjaftueshëm për ambicien dhe synimin tonë për këtë qendër e që ju të gjithë do të uronit”, theksoi ai.
Kreu i ASH-së Gjinushi tha se bashkëpunimi do të shtrihet edhe në mbështetjen e kërkimit me rritjen e nivelit e cilësisë së kërkuesve të rinj, nëpërmjet përmirësimit të kurrikulave, futjes së disiplinave të reja dhe masterit në fushat përkatëse.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
