Librazhd, çifti i turistëve nga Zvicra humbin në parkun e Shebenikut

Një çift turistësh nga Zvicra kanë humbur në parkun kombëtar të Shebenikut në Librazhd, në zonën e mbrojtur që shtrihet në juglindje të vendit.

Dyshohet se ata kanë dalë nga shtegu i shënuar dhe kanë humbur orientimin gjatë një ecjeje në natyrë.

Menjëherë pas marrjes së njoftimit, shërbimet e policisë së Librazhdit u nisën drejt zonës për të lokalizuar dhe ndihmuar turistët. Në mbështetje të tyre shkuan edhe punonjës të zonave të mbrojtura.

Pas disa orësh kërkime, turistët u gjetën në gjendje të mirë shëndetësore.

Autoritetet pas njoftimit të kësaj ngjarjeje bëjnë apel për kujdes të shtuar ndaj vizitorëve që frekuentojnë zonat e thella malore dhe kërkojnë respektimin e sinjalistikës dhe shtegut të miratuar për ecje.