Aeroporti Ndërkombëtar i Prishtinës “Adem Jashari” ka njoftuar se trafiku ajror mbetet i bllokuar deri më 27 qershor.
Ndër pasojat kryesore të pandemisë ka qenë dhe kufizimi i transportit dhe mbyllja e aeroporteve. Një gjë e tillë ka ndodhur dhe në Kosovë, ku aeroporti kryesor, ai i Prishtinës, nuk ka qenë operacional që prej fillimit zyrtar të epidemisë atje në mars.
Përmes një njoftimi për media, Aeroporti “Adem Jashari” njoftoi se është i gatshëm të rinisë operimin në të gjitha ,masat e sigurisë të sanksionuara nga autoritetet, por presin që qeveria e Kosovës të marrë vendim për këtë gjë.
“Qeveria e Kosovës, është autoriteti përkatës, që vendos për datën e lejimit të të gjitha fluturimeve, si në ardhje po ashtu edhe në nisje”, thuhet në njoftimin e Aeroportit “Adem Jashari”.
Ministri i Infrastrukturës, Arban Abrashi më 9 qershor, pati deklaruar për Radion Evropa e Lirë se pritet që Aeroporti “Adem Jashari” të rihapet brenda dhjetë ditësh.
Ndërkaq, zyrtarët e aeroportit kanë deklaruar në fillim të qershorit se kanë bërë përgatitjet e duhura për mbrojtje nga koronavirusi, duke dezinfektuar hapësirat dhe duke krijuar kushte për mbajtjen e distancës fizike në terminalin e aeroportit.
Më 13 mars, Kosova raporti rastet e para me koronavirus. Autoritetet vendosën masa izolimi duke mbyllur kufijtë tokësorë, shkollat dhe shumë biznese. Më 1 qershor, Qeveria e Kosovës lehtësoi edhe më tej masat, duke rihapur kufijtë tokësorë. Megjithatë, lirimi i masave të karantinimit u shoqërua me rritje të rasteve të reja, çka ka bërë që qeveria e re Hoti të tregohet më e kujdesshme në lejimin e hapjes së plot të vendit.
Bllokimi i trafikut ajror në Prishtinë sjell disa pasoja edhe për qytetarët e Shqipërisë, të cilët përdorin aeroportin “Adem Jashari” për të kryer udhëtime të lira kryesisht me Gjermaninë apo Evropën Lindore.
Ndërkohë, aeroporti “Nënë Tereza” në Tiranë ka njoftuar rifunksionimin e tij të plotë që prej ditës së sotshme, e megjithatë shumë vende Evropiane nuk i kanë hapur tërësisht kufijtë e tyre për shtetasit jashtë BE-së. “Normalja e re” që ofron periudha e pandemisë po shoqërohet jo vetëm me kufizime të transportit por edhe shtrenjtësim të tij në rastet kur ai lejohet.
Kujtojmë se transporti inter-urban mbetet i bllokuar nga autoritetet qeveritare, si aktivitet me rrezikshmëri të lartë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
