Dhjetë ditë pa filluar sesioni i ri parlamentare, Lefter Koka, ka njoftuar sot se ka lënë mandatin si deputet i Durrësit në radhët e Partisë Socialiste.
Largimin e ka njoftuar vetë ai përmes një postimi në rrjete sociale.
“2 dekada më parë me përgjegjësi të lartë publike, mora përsipër të garoja për të qenë zëri qytetarëve durrsakë. Në këtë rrugëtim plot sfida, suksese e padiskutim dhe dështime, pata fatin të dëshmoj fuqinë e besimit, si dhe dinjitetin e njerëzve që punojnë çdo ditë me ndershmëri dhe përkushtim për një të ardhme më të mirë”, shkruan ai.
Koka shtoi se nga sfidat me të cilat u përball është gjithmonë e vështirë të ndalesh një moment dhe të vlerësosh se kur është koha e duhur për të mbyllur një cikël.
Duke falenderuar të gjithë ata që e votuan, Koka sqaroi se me vendimin e tij për të mos e marrë mandatin e deputetit është njohur edhe Komisioni Qendror i Zgjedhjeve.
“Sot është dita që rrugëtimin tim politik, ta vijojnë ata mijëra bashkëpunëtorë të mitë, që më bënë fitues për vite me rradhë dhe që mbase nuk kam mundur asnjëherë t’i falenderoj sa duhet. Sot, e ardhmja u përket atyre! Me këtë vendim timin, është njohur institucionalisht si Komisioni Qendror i Zgjedhjeve ashtu edhe Kuvendi i Shqipërisë”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
